monumenta.ch > Hildegardis Abbatissa > sectio 10

Word Selection for Searching

Report an Error in this Sectio
Hildegardis Abbatissa, Visiones, 2, 6, 10
Unde sanguine qui de latere eius fluxit se sursum elevante illa imago perfusa, ipsi per voluntatem superni Patris felici desponsatione associata est; quoniam fortitudine passionis Flii Dei ardenter inundante et ad altitudinem coelestium mysteriorum se mirabiliter tollente, quemadmodum odor bonorum aromatum in sublime diffundit, ex ea in candidis haeredibus aeterni regni Ecclesia roborata eidem Unigenito Dei per ordinationem superni Patris fideliter coniuncta est. Quomodo? Ut sponsa sponso suo in subiectionis et obedientiae obsequio subiecta fertilitatis donum cum foederis amore ab eo in procreatione filiorum accipiens, ut eos ad haereditatem suam adducat; ita etiam Ecclesia Filia Dei in humilitatis et charitatis officio coniuncta, regenerationem spiritus et aquae cum salvatione animarum ab eo ad restaurationem vitae suscipiens eas ad superna transmittit. Unde etiam carne et sanguine eius nobiliter dotata est; quia ipse Unigenitus Dei corpus et sanguinem suum in praecellentissima gloria fidelibus suis qui et Ecclesia et filii Ecclesiae sunt, ita contulit, ut vitam in superna civitate per ipsum possideant. Quomodo?